"ಅವನು "

"ಅವನು " 

ಕೇಳಿರುವೆ ಪ್ರಶ್ನೆಗಳ ಹಲವಾರು ನೀನು ,

ಉತ್ತರಿಸಲಾರೆ ... ಮೌನಿ ನಾನು . . . 

ಅರಿತಿರುವೆಯಾದರೆ ನೀ ಎನ್ನ , 

ಕಾಣಬಲ್ಲೆಯಾದರೆ ನನ್ನ ಮನವನ್ನ . . .

ಓದು ನನ್ನ ಕಂಗಳ ,

ಬಿಚ್ಚಿಡುವೆ ನನ್ನೊಲವ ಹಾಳೆಯ,

ಅರಿತುಕೋ ನನ್ನೆಲ್ಲಾ ಭಾವಗಳ . . . 

ಅವನು . . . 

ಮನವ  ಝಲ್ಲೆನಿಸುವವನು ,

ನನ್ನಂತರಾಳದಲಿ ಲೀನವಾದವನು ,

ಮೌನದಲೇ ಮನವ ಮೋಹಿಸಿದವನು ,

ಕನಸುಗಳ ಕಾಣಲು ಹುರಿದುಂಬಿಸಿದವನು ,

ಬೆಂಬಿಡದೇ ಕಾಯ್ವೆ ಎಂದು ಕೈ ಹಿಡಿದವನು ,

ಖುಷಿಯ ಇಮ್ಮಡಿಸಿ ,ದುಃಖದಲಿ ಪಾಲು ಕೇಳಿದವನು . . . 

ಗುಣಗಳಲಿ ಸಂಯಮಿ , ಮಾತು ಅತೀ ಕಮ್ಮಿ . . . 

ಕಣ್-ನೋಟದಲೇ ಹರುಷವ ಉಕ್ಕಿಸುವವನು . . . 

ನನ್ನ ಬಾಳ ನಂದನದಲಿ ಅವನೇ "ಶ್ರೀ-ರಾಮ" ನು . . . 

ಒಲವಲಿ ನನ್ನ ಆಸೆಗಳ  ಕಾಯ್ವ ಸಹೃದಯಿ ನೀನಿರಬಹುದು ,

 ಮನದ ಗಾಯಗಳಿಗೆ ನೀ ಮದ್ದಾಗುವೆಯಾದರೂ ,

ಮಾಸುವ ಗಾಯಗಳ ಕಲೆಯಲಿ ಬೆಸೆದಿರುವವನು ಅವನು

ಏಕಾಂಗಿ  ಈಗ ನಾನಾದರೂ ,

ಅವನ ನೆನಪುಗಳ ತೊರೆಯಲಾರೆನು ಎಂದೂ  ,

ಮರೆಯಲಾರೆ ಅವನನು . . . 

ತೆರೆಯಲಾರೆ ಮನದ ಕದವ ಇನ್ಯಾರಿಗೂ ನಾನು . . . 

ನೀ ಅವನಲ್ಲ , 

ಬೇಡುವೆ . . .ಕಲುಕಬೇಡ ಮತ್ತೆ ಈ  ಒಡೆದ ಹೃದಯವ  ,

ಕ್ಷಮಿಸು , ಇದುವೇ ನನ್ನ ಮನದಾಳದ ಕೋರಿಕೆಯು  . . .

 -ಪ್ರಜ್ಞಮಾಲಾ