ಪ್ರೀತಿ

" ಪ್ರೀತಿ " 

ಈ ಪ್ರೀತಿಯ ಪರಿಯ 

ಹೇಗೆ ಬಿಚ್ಚಡಲಿ ಗೆಳತಿ ?
ಇದರರ್ಥವ -ನಿರಾಸೆಯ ಬಿಚ್ಚಡಿಲಿ ಹೇಗೆ ಗೆಳತಿ ? 

ಹೊಸತನದ ಸಂಭ್ರಮ ಇದು ,

ಹಳಸಿ , ನಾರುವ ಹುಚ್ಚು  ಇದು 

ನಿಲ್ಲಲಾರದ ಒರತೆಯು ಇದು,

ಚಿಮ್ಮಲಾರದ ಚಿಲುಮೆಯೂ ಇದು

ಕಂಗಳ ಸುಳಿ-ಮಿಂಚು ಇದು,

ಭೋರ್ಗರೆವ ಅಶ್ರುಧಾರೆಯೂ ಇದು 

ತಂಗಾಳಿಯ ತಂಪು ಇದು, ಮುಂಗಾರಿನ ಅಭಿಷೇಕವಿದು 

ಬರಗಾಲದ ಬರಡು ಇದು , ಪ್ರವಾಹದ ಆರ್ಭಟವೂ ಇದು  

ಎದೆಯ ಬೆಳಗುವ ನಂದಾದೀಪವಿದು,

ಧಗಧಗಿಸುವ ಕಾಡ್ಗಿಚ್ಚು  ಇದು

ಬೆಂಬಲಿಸುವ ಚೈತನ್ಯವಿದು ,

ದಿಗುಲುಗೊಳಿಸುವ ದುರ್ಬಲತೆಯೂ ಇದು 

ಕಲ್ಪನೆಯ ಲಹರಿಯಲಿ ತೇಲಿಸುವ ಅಲೆಯು  ಇದು,

ನೈಜತೆಯ  ಕೂಪಕೆ ಮುಗ್ಗರಿಸಿ ತಳ್ಳುವ ಮುಳ್ಳು ಇದು 

ಹೇಳೇ ಸಖಿ, ಈ ಪ್ರೀತಿಯ ಪರಿ-ಪರಿಯಾಗಿ ಬಿಚ್ಚಿಡಲಿ ಹೇಗೆ,

ಆಗಮನದ ಬೆನ್ನಲ್ಲೇ ನಿರ್ಗಮಿಸಿದ ಗ್ರಹಣವು ಇದು ...

ತೊಯ್ದಾಟ , ಹೊಯ್ದಾಟ , ಜಂಜಾಟಗಳ  ಕಾಟವು ಇದು ...
ಬಿಡುವೆನೆಂದರೂ ಬೆಸೆಯುವ ಮಾಯೆ ಇದು ,ಜಾಲವು ಇದು ... 

-ಪ್ರಜ್ಞಮಾಲಾ