ಹಣತೆ
ಬೆಳಗಿಸಿರುವೆ ಒಲವ ಹಣತೆ ಎಂದಿನಿಂದ ,
ಕಾಯುತಿರುವೆ ಶ್ರದ್ಧೆಯಲಿ ಬಹು ನಿರೀಕ್ಷೆಯಿಂದ . . .
ಕನಸುಗಳ ಶುಭಾರಂಭವು ನಿನ್ನಿಂದ ,
ವಿಶ್ವಾಸದ ಮುಗುಳ್ನಗೆಯು ನಿನ್ನಿಂದ ,
ಈ ಮಿಡಿತ-ತುಡಿತಗಳೂ ನಿನ್ನಿಂದ . . .
ಒಲವ ಈ ಸುಂದರ ಅನುಭಾವ,
ನಿನ್ನಿಂದ . . .
ನಿನ್ನಿಂದ . . .
ಒಲವ ನನ್ನ ಪ್ರಪಂಚ ಪರಿಪೂರ್ಣ ನಿನ್ನಿಂದ ,
ನೀನೇ ಆಗಸ , ನೀನೇ ಸಾಗರ. . .
ನೀನೇ ಆಗಸ , ನೀನೇ ಸಾಗರ. . .
ನನ್ನೆಲ್ಲಾ ಕೋಪವ ಸಹನೆಯಲಿ ಬಂಧಿಸುವ,
ಕ್ಷಣದಲೇ ನಗುವ - ಉಕ್ಕಿಸುವ
ಮಾಯಗಾರನು ನೀನೇ
ನನ್ನ ಅಳುವಿನ ಕಡಲ ಕಂಡವನೂ ನೀನೇ ,
ಭಾವಗಳ ಆಳ ಅರಿತವನೂ ನೀನೇ . . .
ಬಾಳ ಪ್ರತಿ ಹಂತದಲಿ ಸ್ಫೂರ್ತಿಯೂದವನು ನೀನೇ ,
ಕ್ಷಣವೂ ಸವಾಲಾಗಿ ಕಾಡುವವನೂ ನೀನೇ . . .
ಮನಸಿನ ರಾಜ್ಯವ ಆಳುವ ಅರಸನೂ ನೀನೇ ,
ಅರಿತಷ್ಟೂ ಆಗಂತುಕನಾಗಿ ದೂರ ಸರಿಯುವವನು ನೀನೇ . . .
ಒಂಟಿತನದ ಹತಾಶೆಯು,
ನಿರ್ಲಕ್ಷ್ಯದ ಕಂಪನವು , ವಿರಹದ ದುಸ್ಸ್ವಪ್ನವೂ ನೀನೇ . . .
ಓ ನನ್ನ ಒಲವೇ ,
ಪ್ರೀತಿಯ ಪ್ರತಿ ಹಾಳೆಯ ಕಗ್ಗಂಟು - ನಿಘಂಟು ಎಲ್ಲವೂ ನೀನೇ . . .
ಒಂಟಿತನದ ಹತಾಶೆಯು,
ನಿರ್ಲಕ್ಷ್ಯದ ಕಂಪನವು , ವಿರಹದ ದುಸ್ಸ್ವಪ್ನವೂ ನೀನೇ . . .
ಓ ನನ್ನ ಒಲವೇ ,
ಪ್ರೀತಿಯ ಪ್ರತಿ ಹಾಳೆಯ ಕಗ್ಗಂಟು - ನಿಘಂಟು ಎಲ್ಲವೂ ನೀನೇ . . .
ಕುಳಿತಿಹೆನು ನಿನ್ನ ಒಲವ ದ್ವಾರದಲಿ ನಾನು ,
ಕಂಗಳಲೇ ಹೊಸೆದಿರುವೆ ನಿನಗಾಗೆ ನನ್ನೆಲ್ಲಾ ಒಲವನು ,
ಈ ಕಾಯುವಿಕೆಯು ನನ್ನ ಪರೀಕ್ಷೆಯೇನು ?
ಅಥವಾ
ಒಲವ ನಿನ್ನ ದಾರಿಯಲಿ ನಾನು ನಿಶಿದ್ಧಳೇನು ?
ಅಸ್ಪಷ್ಟ ನಿನ್ನ ಭಾವದಲಿ - ನನ್ನ ಒಲವ ದಿಕ್ಕೆಡಿಸದಿರು ,
ಮೃದುವು ಈ ಮನಸು ,
ಕೋಪದಲಿ , ಮೌನದಲೇ ಚುಚ್ಚದಿರು . . .
ಈ ವೇದನೆ ನನಗಿನ್ನೂ ಸಹ್ಯವಲ್ಲ . . . .
ಮೃದುವು ಈ ಮನಸು ,
ಕೋಪದಲಿ , ಮೌನದಲೇ ಚುಚ್ಚದಿರು . . .
ಈ ವೇದನೆ ನನಗಿನ್ನೂ ಸಹ್ಯವಲ್ಲ . . . .
ನನ್ನೀ ಒಲವು ಅಚಲ,
ಆಟಿಕೆಯೆಂದು ತಿಳಿಯದಿರು. . .
ಕೊನೆಯ ನಿವೇದನೆಯು ನಿನಗೆ ,
ಆಟಿಕೆಯೆಂದು ತಿಳಿಯದಿರು. . .
ಕೊನೆಯ ನಿವೇದನೆಯು ನಿನಗೆ ,
ತೆರೆದಿಡು ಒಮ್ಮೆ ನಿನ್ನ ಮನಸನು ,
ತೋರಿಬಿಡು ನಿನ್ನ ಮನದಲಿ ನನ್ನ ಸ್ಥಾನವನು. . .
ಅಳಿಸಿಬಿಡು ನನ್ನೆಲ್ಲಾ ಆತಂಕಗಳನು . . .
ಮರೆಯಾಗಿಸು ನನ್ನೆಲ್ಲಾ ಪ್ರಶ್ನೆಗಳನು
ನಿವೇದನೆಯು ನಿನಗೆ , ಹೇಳಿಬಿಡು ಉತ್ತರ . . .
ಮನದ ಕದವ ತೆರೆದು ,ಬೆಳದಿಂಗಳ ಪಸರಿಸುವೆಯಾ ,
ಆಸೆಯ-ಗರಿಗಳುದುರಿಸುವ ಬಿರುಗಾಳಿಯಾಗುವೆಯಾ . . .
ಕಾಯುತಿರುವೆ ನಿನ್ನ ಉತ್ತರ . . .
ಜೊತೆಯಾದರೆ ಉಸಿರಿನಲಿ ಉಸಿರಾಗುವೆ ಅನುಕ್ಷಣ ,
ಇಲ್ಲದಿರೇ
ಗೆಳತಿಯಾಗಲಾರೆ , ಬಾಳ ಮುಳ್ಳಾಗಲಾರೆ
ಗೆಳತಿಯಾಗಲಾರೆ , ಬಾಳ ಮುಳ್ಳಾಗಲಾರೆ
ಎಂದೂ ಇರದಂತೆ ಅದೃಶ್ಯವಾಗುವೆ ಇದೇ ಕ್ಷಣ . . .
ನಿವೇದನೆಯು ನಿನಗೆ , ಹೇಳಿಬಿಡು ನಿನ್ನ ಉತ್ತರ . . .
-ಪ್ರಜ್ಞಮಾಲಾ
0 comments:
Post a Comment