ಕೋಪ
ಪ್ರೀತಿ ಅನಂತವಾಗಿದೆ ,
ಆಸೆಯ ಕನಸುಗಳು ಅಗಣಿತ ತಾರೆಯಾಗಿವೆ ,
ಪ್ರೀತಿ ಸಾಗರದಷ್ಟಿದ್ದರೂ ,
ಆಸೆಗಳು ಮುನಿಸಿನ ಪರದೆಯಲಿ ಮರೆಯಾಗಿವೆ . . .
ಕೋಪ ಮನಸಲಿ ನೆಲೆ ಮಾಡಿದೆ ,
ನಂಬಿಕೆಯ ಬುನಾದಿಗೇ ಗೆದ್ದಲು ಹಿಡಿದಿದೆ
ಮುನಿಸು ತರವಲ್ಲ ಮುಗ್ಧ ಮನಸಿಗೆ -ತಿಳಿದರೂ ಈ ಸತ್ಯ ,
ಕೇಳದು ಮನಸು ... ಎಂದೂ ಇಲ್ಲದ ಹಠವ ಹಿಡಿದಿದೆ
ನಿನ್ನ ಮನದಲಿ ನಾನಿರುವೆನೇ ,
ನಿನ್ನ ಒಲವ ಹಕ್ಕು ನನಗೆ ಮೀಸಲೇ ,
ಈ ಪ್ರೀತಿಯು ನಿನಗೆ ನಿರ್ಜೀವ ಆಟಿಕೆಯೇ . . .
ಪ್ರಶ್ನೆಗಳು ಹಲವು ಮನವ ಕಾಡುತಿದೆ ,
ನಿನ್ನ ಅಸಡ್ಡೆಯ ಮಾತುಗಳ ಮಾರ್ದನಿ
ಮನದಲಿ ಬಿರುಗಾಳಿಯ ಎಬ್ಬಿಸಿರೆ ,
ನಿರ್ಲಕ್ಷ್ಯದ ಆ ನೋಟ ಅಂಕುಶವಾಗಿ ತಿವಿಯುತಿದೆ ,
ಗರ್ವದ ಹೊರೆ ಒಲವ ಸೇತುವೆಯ ಜಗ್ಗುತಿರೆ ,
ಸನಿಹವಿದ್ದರೂ ಮನಗಳು ದೂರ - ಬಹು ದೂರ ಸಾಗಿದಂತಿದೆ
ನಿರ್ಲಿಪ್ತ ನಿನ್ನ ಭಾವ ಮನವ ಹಿಂಡುತಿದೆ
ಬಿಚ್ಚಿಡು ಒಮ್ಮೆ ನಿನ್ನ ಮನದ ಬುತ್ತಿಯ ,
ನಗುವಿನಲಿ ಜೊತೆಯಾದ ಮನಸಿಗೆ , ಅಳುವಿನಲಿ ಪಾಲು ಹಂಚಿನೋಡು
ಬಾಳು ಒಂದು ಸುಂದರ ಕಗ್ಗಂಟು . . .
ಏಕಾಂಗಿ ನೀನಲ್ಲ ,
ಜೊತೆಯಾಗಿ ಬಿಡಿಸೋಣ ಅದರ ಪ್ರತಿಯೊಂದು ಒಗಟು . . .
ಈ ಮೌನ , ಈ ನಿರಾಶೆ , ಈ ಅಪನಂಬಿಕೆ . . .
ತಿಳಿಯೆಯಾ ಇದರ ಪರಿಣಾಮ . . . ?
ಕವಲೊಡೆಯಬೇಕೇ ನಮ್ಮ ದಾರಿ . . . ?
ಇಲ್ಲವೇ ,
ಮರಳಿಸುವೆಯಾ ನಮ್ಮ ಪ್ರೀತಿ ಅಪರಂಜಿಯ . . . ?
ಬಿಡುವೆನೆಂದರೂ ಬಿಡದ ಮಾಯೆ ನಿನ್ನದು,
ಬಿಡುವೆನೆಂದರೂ ಬಿಡದ ಮಾಯೆ ನಿನ್ನದು,
ಮರಳಿಸುವೆಯಾ ಆ ಮೋಹ ,
ನಮ್ಮ ಪ್ರೀತಿ ಅಪರಂಜಿಯ . . . ?
ನಮ್ಮ ಪ್ರೀತಿ ಅಪರಂಜಿಯ . . . ?
ಕಾಯುತಿರುವೆ ನಿನ್ನ ಉತ್ತರ . . .
ಕಾಯುತಿರುವೆ ನಿನ್ನ ಉತ್ತರ . . .
-ಪ್ರಜ್ಞಮಾಲಾ
0 comments:
Post a Comment