ಹಾಗೆ ಸುಮ್ಮನೆ

ಯಾವುದೀ ಖುಷಿಯು ?
ಏಕೀ ಖುಷಿಯು?
ತಿಳಿಯದಾದೆ , ಆದರೂ ನಲಿಯುತಲಿರುವೆ
ಬಣ್ಣಿಸಲಾರೆ, ಆದರೂ ಪ್ರಫುಲ್ಲಗೊಂಡಿರುವೆ

ಸುಂದರ  ಸ್ವಪ್ನಗಳ ನೇಯುತಲಿ ,
ಬಡಬಡಿಸುವೆ  ಕೂತಲಿ,
ನಗುತಲಿಹೆನು ಮೌನದಲಿ,
ಗುನುಗುತಲಿರುವೆ   ಅನು'ರಾಗ'ದಲಿ 

ಪ್ರತಿಯೊಂದು ನೋಟವು  ಛೇಡಿಸುವುದೀಗ,
ಕೇಳಬಯಸುವೆ ಅದೊಂದೇ  ಸ್ವರವ,
ಬಿಡಿಸುತಲಿರುವೆ ಮನದ ಪುಟದಲಿ
ಅವನದೇ ಚಿತ್ರವ ,
ಮಿನುಗುವ ತಾರೆಗಳು ತೋರುವುದೀಗ 
ಅವನ  ಮುಗುಳ್ನಗೆಯ



ಹೊಸದಾಗಿ ಕಾಣುತಿಹುದು
ಎಲ್ಲವೂ ನನಗೀಗ,
ಬಂಧನದಲ್ಲೂ ಅನುಭವಿಸುತಿಹೆನು
ಅನನ್ಯ ಸ್ವಾತಂತ್ರ್ಯವ . . .
ಎರಡಕ್ಷರದ ಈ  ಪದಕೆ
ದೇವ ಕೊಟ್ಟಿಹನೆಂತಹ  ಮಾಂತ್ರಿಕ ಶಕ್ತಿಯ  ?


ಕೇಳಲಾರೆಯಾ  ನನ್ನೀ ಮನದ ತುಡಿತ
ಬಯಸಿಹೆನು ನಿನ್ನನು  ನನಗಾಗಿಯೇ ಶಾಶ್ವತ
ಆದರೂ . . .
ಅಳುಕುತಲಿದೆ ಈ ಮನ 
ನೀರ  ಮೇಲಿನ ಗುಳ್ಳೆಯಾಗುವುದೇ
ನನ್ನೀ ಭಾವದ ಮಿಡಿತ ?

ಕಾಯುತಿಹೆನು  ನಿನ್ನ  "ಉತ್ತರ"  . . .
                                                       -ಪ್ರಜ್ಞಮಾಲಾ